የፕላስቲክ ብክለትን ለመቆጣጠር ዓለም አቀፍ ስምምነት ላይ ለመድረስ ሲካሄድ የቆየው የጄኔቫው ጉባኤ ካለውጤት ተጠናቋል። የምድርም ሆነ የውኃ አካላትን ከሚጣሉ የፕላስቲክ ቆሻሻዎች፤ እንዲሁም ከአደገኛ ንጥረ ነገሮች የሚዘጋጁ የፕላስቲክ ቁሳቁሶች እንዳይመረቱ በጋራ ለመወሰን አልተቻለም፡፡
የአለም ሀገራት ኬንያ ላይ ከሶስት አመት በፊት በተካሄደው ዓለም አቀፍ ጉባኤ ነበር ሕጋዊ አሳሪነት ያለው የጋራ ስምምነት እንዲኖር የተስማሙት። አላማው በዋናነት የፕላስቲክ ምርቶች ዳግም ለጥቅም መዋል የሚችሉበት እንዲሁም፤ የሚመረቱበት ጥሬ ዕቃም ምንነት ትኩረት እንዲያገኝ የሚለውን መሠረት ያደረገ ነው።
በዚህ መነሻነት ስድስት ተከታታይ ውይይትና ድርድሮች በሦስት ዓመታት ውስጥ ቢካሄዱም ሃገራት ከስምምነት ላይ አልደረሱም፡፡